Սյունիք այցելելիս պետք է լինել Կապանում՝ տեսնելու համար 3-4 րդ դարերով թվագրվող Բաղաբերդի ամրոցը, 10-րդ դարի միջնադարյան վանական համալիր Վահանավանքը, Սուրբ Մեսրոպ Մաշտոց եկեղեցին, Ողջի գետի մոտակայքում գտնվող բլրի վրա գտնվող Հալիձորի 17-րդ դարի բերդ-ամրոցը, այցելել Կապանի պատմության և երկրագիտության թանգարանները, և իհարկե լինել Խուստուփ լեռան գագաթին՝ վայելելու Խուստութից բացվող շքեղ տեսարանը։

Կապան տեղանունը Սյունիքում հիշվում է վաղնջական ժամանակներից: Որպես գավառի տեղանուն այն նշանակում է լեռներով ագուցված`կապված երկիր, անանցանելի լեռնակիրճերի բազմությամբ կապանքնված երկրամաս: Կապան անունը հայկական մատենագրության մեջ հիշատակված է 5 –րդ դարից: Գրավոր աղբյուրներում ի հայտ է եկել նաև Երկիրն Խափանու տարբերակը, իսկ ուշ միջնադարում գործածվում էր նաև Ղափան բարբառային տարբերակը: Կապանն ունի հարուստ պատմամշակութային ժառանգություն` բազմաթիվ հնավայրեր, քարանձավներ, կիկլոպյան ու վաղ միջնադարյան կառույցների ավերակներ: